சர்வதேச டி20 கிரிக்கெட்டில் 100 விக்கெட்டுகளை கைப்பற்றிய முதல் இந்தியர்: அர்ஷ்தீப் சாதனை

ஓமன் அணியுடன் நடைபெற்ற ஆசியக் கோப்பை டி20 போட்டியில் ஒமான் வீரர் விநாயக் ஷுக்லாவை வீழ்த்தியதன் மூலம் டி20 சர்வதேச கிரிக்கெட் போட்டிகளில் 100 விக்கெட்டுகள் வீழ்த்திய மைல்கல்லை முதன் முதலில் எட்டிய இந்திய பவுலர் என்ற பெருமையைப் பெற்றார் அர்ஷ்தீப் சிங்.

தனது 64-வது டி20 போட்டியில் 100-வது விக்கெட்டை வீழ்த்தினார். டி20 சர்வதேச கிரிக்கெட்டில் 100 விக்கெட்டுகள் கிளப்பில் இணைந்த 25-வது பவுலர் அர்ஷ்தீப் சிங். இதில் 12 வேகப்பந்து வீச்சாளர்கள் அடக்கம்.

இங்கிலாந்துக்கு எதிராக 2022-ல் டி20-யில் அறிமுகமானார். இப்போது 100 விக்கெட்டுகளை 3 ஆண்டுகள் 74 நாட்களில் எடுத்ததாக கிரிக் இன்போ புள்ளி விவரங்கள் தெரிவிக்கின்றன. ஒரு வேகப்பந்து வீச்சாளராக விரைவில் 100 விக்கெட்டுகள் சாதனை படைத்த 2-வது வீரர் ஆனார் அர்ஷ்தீப் சிங்.

பஹ்ரைனின் ரிஸ்வான் பட் 2 ஆண்டுகள் 240 நாட்களில் 100 டி20 விக்கெட்டுகள் சாதனையை எட்டி முதலிடத்தில் உள்ளார். மற்ற எவரும் 100 டி20 சர்வதேச விக்கெட்டுகளை 4 ஆண்டுகளுக்கு குறைவாக எடுத்ததில்லை.

மற்றொரு கிரிக் இன்போ புள்ளி விவரங்களின் படி பஹ்ரைனின் ரிஸ்வானை விட அர்ஷ்தீப் சிங் செய்த சாதனை என்னவெனில் 64 போட்டிகளில் 1329 பந்துகளில் அர்ஷ்தீப் 100 விக்கெட்டுகள் மைல்கல்லை எட்டியுள்ளார் என்பதுதான்.

விரைவு கதியில் 100 டி20 சர்வதேச விக்கெட்டுகளை வீழ்த்திய வீரர்கள்:

>ரஷீத் கான் - 53 போட்டிகள் 1185 பந்துகள்
>சந்தீப் லாமிச்சேன் - 54 போட்டிகள் 1220 பந்துகள்
>அர்ஷ்தீப் சிங் - 64 போட்டிகள் 1329 பந்துகள்
>வனிந்து ஹசரங்கா - 63 போட்டிகள் 1362 பந்துகள்
>ரிஸ்வான் பட் - 66 போட்டிகள் 1426 பந்துகள்.

சராசரியில் அர்ஷ்தீப் சிங்கின் 18.37 வேகப்பந்து வீச்சாளர்களில் 3வது சிறந்த சராசரியாகும். இதிலும் பஹ்ரைனின் ரிஸ்வான் பட் 16.68 என்று முன்னிலை வகிக்கிறார். ஓமான் இடது கை வேகப்பந்து வீச்சாளர் பிலால் கான் 16.95 என்ற சராசரியில் 100 விக்கெட்டுகளைக் கைப்பற்றியுள்ளார்.

அதே போல் பவர் ப்ளேயில் அதிக விக்கெட்டுகள் என்பதில் அர்ஷ்தீப் சிங் முதலிடம் வகிக்கிறார். 43 விக்கெட்டுகளை 7.50 என்ற சிக்கன விகிதத்தில் பவர் ப்ளேயில் எடுத்துள்ளார் அர்ஷ்தீப் சிங்.

ஆப்கானின் இடது கை பவுலர் பசலுல்லா பரூக்கி 31 விக்கெட்டுகளை 6.55 என்ற சிக்கன விகிதத்தில் எடுத்து 2ம் இடத்தில் இருக்கிறார்.

பாகிஸ்தானின் ஷாஹின் ஷா அஃப்ரீடி பவர் ப்ளேயில் 31 விக்கெட்டுகளை எடுத்துள்ளார், ஆனால் சிக்கன விகிதம் 7.45.

வங்கதேசத்தின் டஸ்கின் அகமது பவர் ப்ளேயில் 30 விக்கெட்டுகளை 6.73 என்ற சிக்கன விகிதத்தில் எடுத்துள்ளார்.

அதே போல் டெத் ஓவர்களில் அதிக விக்கெட்டுகள் என்பதிலும் அர்ஷ்தீப் சிங் 48 விக்கெட்டுகளுடன் முதலிடம் வகிக்கிறார். இவருக்கு அடுத்தடுத்த இடங்களில் ஈசான் கான், ஹாரிஸ் ராவுஃப், ஜுனைத் சித்திக் ஆகியோர் உள்ளனர்.